Achat de pierres de moulin de Manosque à Viens

Texte transmis par les Amis de Viens mars 2025

​Transcrit par Bernard Renoux en 2023  des AD AHP
​

Baume carrière d'extraction des pierres

traces des outils

meule en cours d'extraction

maison du carrier

sa signature

Me Anthoine Giraud, Manosque               18/3/1582  
​
Achept de troys piarres de mollin pour la communaulte de Manoasque
Lan mil cinq cens huictante deux et le dix huictiesme jour du moys de mars environ quatre heures apres midi en pnce de moy notere royal soubzsigné et tesmoingz soubznommés, personnellement estably me Claude Helion du lieu de Viens lequel de son bon gre pour luy et les siens a vendu par tiltre de vendition bonne et vallable à monsieur me Jacques Boyer docteur en medecine et sire Jacques Rabut consulz en chef, sires Jehan de Ulmo, Jehan Garnier, Olivier Beauchamp, N Pallamides de Forlinio, sires Claude Clementis, Claude Tacil et Laurens Ravil aultres consulz du nombre des douze de la communaulté de ceste ville de Manoasque pntz et pour icelle communaulté debuement estippullantz, scavoyr est troys piarres pour mectre et pozer aux mollins vieulx dictz de Durance de ladite communaulté, scavoyr deux jas et ung virant, deux desquelles de six pans moingz quart de largeur et ung pan demy quart despesseur et laultre de cinq pans et demy de largeur et de mesme espesseur. Et ce pour le prix et somme de trente huict escus dor sol vingt quatre soulz tournois que seront payables par Michel Montagnier et Guilhen Daigremont modernes fermiers desdits mollins et autres de ladite communaulté, ledit Montagnier pnt et ainsy le promectant tant pour luy que ledit / Daigrement en dedution du prix de la ferme desdits mollins, scavoyr incontinent que lesdites piarres seront posees et par lesdits sieurs consulz ou depputez receues et suyvant le pacte porte par lacte de leur arrantement et ferme desdits mollins receu comme ont dict par me Claude Ferrand notere en lannee mil cinq cens septante neuf et du jour y contenu. Et moyennant icelle somme ledit Hellion sera tenu comme a promis apporter ou fere apporter lesdites troys piarres de la largeur et moison ci-dessus especiffiée esdits mollins vieulx, icelles mecter poser et rendre virantz et mollantz dans ung moys prochain à ses propres coustz et despens en bonne et debue forme. Promectant avec ce lesdites parties chacune en droict soy et comme luy touche avoyr agreable et tenyr ferme et estable tout le contenu cy dessus sans y contravenyr à peyne de payer par partie contravenante tous despens dommaiges et interestz, et pour le tout mieulx tenyr et garder, ilz ont submis et oblige scavoyr lesdits sieurs consulz tous et chacuns les biens de ladite communaulté et lesdits Hellion et Montagnier tous et chescuns leurs biens pntz et advenyr aux cours des submissions et aultres de Provence, renoncans à tous droictz et moyens à ce contreres et ainsy lont / (97) juré, requerantz et concedans acte que faict et publié a este audit Manoasque et dans la maison commune dicelle ez presances de me Marc Mandine charpentier et me Claude Gay fonteynier dudit Manoasque tesmoingz requis et appellez quy a sceu escripre soubzsigné.

Signatures
Jaques Boyer consul   Rabut consul  Clemens consul  Jan de Ulmo conselo  De Forlinio consul  Laurans Revil  Marc Mandyne et de moy Anthoine Gireaud notere royal dudit Manoasque recepvant cy soubzsigne  Gireaud notere

En bas de page :
Le 30 juillet 1582, quittance de 4 écus et 32 soulz.
Le 26 janvier 1583, quittance de 12 écus 40 soulz pour reste du payement des trois pierres.